صباح الخير يا عم أحمد
صباح الخير ياعم أحمد. وألف تحية، لروحك الحلوة..
أنا واحد بيحبك، من بين ملايين، يمكن عمرى ما كلمتك، "وش لوش" وما أفتكرش قعدت معاك قبل كدا، عارف قعدتك حلوة، بس اللُقا ـ كما تعلم ـ قدر ونصيب. لكن كنا سوا في الميدان، وفي "طلعت حرب"، كنت في وسطنا شمعة، ناخد منك النفحة، ونكمل مسيرتنا.
صباح الخير على الورد اللى في خدودك، على اللمعة اللى في عيونك، على الفقراء في قصايدك..
صباح الخير على قلبك الدافي، وصراحتك، على لسانك الساخر اللاذع اللى اتعود يقول الحق..
صباح الخير على مصر تنده عليك، تجاوب شعر، تسمع نداها تقول : نعم يامّه.
صباح الخير على صوتك، مجمّع الأحبة في الميدان والشارع، صباح الخير على قصايدك، هتاف يطلع، يهز الكون .
صباح الخير عليك، في أول أيامك في دار الحق. الورد اللي فتّح في جناين مصر بيقول لك "صباح الفل".
صباح الخير، من أهلك ومن ناسك، من العمال والفلاحين والطبة، والحرافيش، والفقراء، والدراويش، والمجاذيب.
صباح الخير يا أبو النجوم، يا فاجومي، يا مصري يا عربي يا أصيل.
صباح الخير عليك وأنت بتحضن عبدالناصر، وبتقول له "كل الجراح طابت".
صباح الخير، عليك وعلى حبايبك. وسلامنا أمانة يا عم أحمد. للشهداء، للحسيني أبوضيف ومحمد الجندي وكل رفاقهم، لعرابي والنديم وجيفارا. لحبيبك الشيخ إمام. لجاهين. وسيد الكل فؤاد حداد، ولكل عشاق بهية.
صباح الخير عليك وأنت وسط حبايبك الشهداء، متشوقين يعرفوا منك، يسمعوا عنا وعن حالنا، أمانة عليك تبلغهم، تطمنهم: ثورتنا وثورتهم لسه مستمرة. قلهم يا نجم: مصر الثورة راكبة الموجة العفية، وماشية في سكتها لبر السلامة.. معجبانية وصبية.
صباح الخير على روحك، هتفضل عايشة حوالينا، طول ما الشموع قايدة، وبتنور لنا السكة، طول ما مصر غنوة مفرعة في الحلق، طول ما البقرة حلوب .. تحلب قنطار، طول ما اسكندرية ماريا عروسة البحر، طول ما الثائرين ع العهد، طول ما عامل مصر المجدع عارف دوره في الوردية، طول ما الفلاحين بيرووا الأرض بعرقهم، يزعقو للريح يواتي، طول ما عبدالودود، رابص ع الحدود ومحافظ ع النظام، طول ما الجدع جدع والجبان جبان، طول ما شقلبان.. محطه إذاعه حلاوه زمان، شغالة في الميدان، طول ما الفلسطيني بيقاوم والحجر في إيديه، طول ما مصر ولادة، وفيها الطلق والعادة، طول ما شمسنا طالعة برغم القلعة والزنازين.
صباح الخير ياعم أحمد.
الأخبار المتعلقة:
رايح مشوار وراجع!
«بهية» تودع «الفاجومى»
«نجم» لن يسقط أبداً
هتوحشنا يا عم نجم
ليت «نوارة» تعرف أن أباها لم يمت
نجم الوطن خَفَت..
بالفيديو| جنازة الفاجومى: انهيار وبكاء فى وداع «شاعر الفقراء»
بالصور| رحل جسد «نجم» وترك «كلمة وصورة»
«عيسى»: «نجم» كان متفائلاً.. و«30 يونيو» إحدى نبوءاته
من «الغورية» إلى «مساكن الزلزال».. حياة «نجم» على «السطوح»
آخر كلمات الفاجومى: «ماتخافوش على مصر»
كلمتين لمصر
نجم فى السما