منتجات مخلل بالعسل
العديد من البرطمانات متراصة فوق بعضها البعض، على شكل هرمي صغير، عند النظر إليها يظنها الجميع أنها تحتوي على العسل، وحينما يقدمون على الشراء تكون المفاجأة، فهي مواد مخللة مصنوعة من العسل، لتسيطر عليهم حالة من الدهشة، وهو ما يدفعهم للشراء.
«الكل عارف إن العسل مادة حلوة والناس بتستغرب جداً لما تعرف إن برطمانات مخلل من العسل، وبتكون عايزة تعرف إزاي فيه حاجة كده»، هكذا شغلت «نورا» رواد المهرجان المصري للزيتون لبيع منتجات المكان الذي تعمل به، متحدثة معهم عن أنواع عديدة من العسل الذي تستخدمه في صناعة المخللات، منها عسل الرحيق وحرير الدرة.
فكرة المخلل بالعسل راودت أميرة عبدالرازق، صاحبة المشروع، حينما ابتكرته في مطبخ منزلها منذ 7 سنوات، لتكون في النهاية مصدر رزق، وتحكي «نورا» التي تقف بالمنتجات: «أميرة بتحب تجرب حاجات كتير في المطبخ من هنا جات فكرة مخلل بالعسل، وده عشان فيه أطفال وكبار سن بيكون المخلل خطر عليهم فإحنا سهلّنا أكله».
الزيتون، والجبن والهريسة، جميعها منتجات مخللة بالعسل، دون أي إضافات أخرى: «جبن ملوي مشهورة بتعتيقها، إحنا بقا عملنا الخلطة اللي مكونها الأساسي من العسل عشان تبقى مخللة»، وأهم ما يميز الخلطة المستخدمة الفلفل والعسل والخل بنوعيه الأبيض والتفاح.
«فكرة إنك تعمل مخلل بالعسل لازم تستخدم مقدار زي نسبة وتناسب بينهم عشان ميطلعش طعم عن التاني وده بنسميه تخليل وقتي» هكذا شرحت «نورا» طريقة التخليل، والتي تكون عبارة عن إضافة كمية صغيرة من الملح، حتى يتم التخلص من المياه الموجودة في المنتج، ثم إعادة تخليله مرة أخرى بإضافة خلطة العسل، وبعد ساعات يتم استخدامه للأكل.
إقبال كثيف على منتجات المخلل بالعسل: «المنتجات دي لها زبونها واللي يشتريها بيرجعلها مرة تاني، خاصة إننا بنشارك بيها في جميع المعارض، وفيه ناس بتجيلنا مخصوص»، وعبر مواقع التواصل الاجتماعي يتم الترويج للمنتجات المخللة بالعسل، وبيعها لمختلف المحافظات، وتتمنى «نورا» افتتاح محال كثيرة على أرض الواقع.
تعليقات الفيسبوك