أهالى «بورسعيد» يهددون: «اللى يدوس العلم وجيشنا.. هندوسه»
يرفرف فى السماء، وتظهر بيوت حى الزهور ببورسعيد خلفه، يحمل رسالة مهمة ومختلفة عن غيره، فهو علم مصر، الذى قرر واتفق الأهالى على تعليقه فى كل شارع وبلكونة وعمود، تضامناً مع الجيش المصرى، تحت شعار «اللى يدوس العلم وجيشنا هندوسه». «هدفنا إننا نوحد صفوفنا، ونخلى علم مصر هو اللى مجمعنا، وبيه نجيب حق جنودنا اللى بيتقتلوا غدر فى سينا»، قالها أحمد حماد، أحد سكان الحى، مؤكداً أن فكرة المبادرة صادقة وتحمل معانى حب وتأييد مطلق تجاه الوطن والجيش، «بعد نشر فيديو الإرهابيين اللى قتلوا فيه جنودنا فى سينا وانتشاره على المواقع، فكرنا نعدى على الجيران وعرضنا عليهم فكرة تعليق علم مصر فى كل حتة فى يوم محدد، عشان يبقى رد ولو بسيط على كل إرهابى فاكر أنه بيخوفنا».
قبل اليوم المحدد، فوجئ «أحمد» بتعليق الأهالى علم مصر فى البيوت وأعمدة إنارة الشوارع، «الناس تجاوبت مع الفكرة، وكله بقى عايز يعمل أى حاجة بإيده عشان يقف جنب أهالى الجنود اللى بتموت يوماتى»، مضيفاً «كل واحد فينا بقى يطلع علم مصر اللى فى بيته واللى يشترى بزيادة، عشان ننقل الصورة لكل أم جندى ونواسيها ونقف جنبها، وكل أهالى المحافظات تعلق علم مصر فى كل مكان وندوس على الإرهاب بوقفتنا إيد واحدة، لأن الإرهاب ملوش مكان بينا».