حفل خيرى لمكافحة أمراض الرجال.. والحضور بـ«الشنب»
«إنت بشنب ولا من غير» سؤال بادر به القائمون على فعالية «رقص شنباتك»، الراغبين فى حضور الحفل الذى اشترط على رواده شرطاً غريباً من نوعه، فالحضور لم يكن بالملابس الرسمية، وإنما بالشنبات.. «طيب واللى معندهوش شنب» سؤال بادر به عدد من المتصلين بالنادى فردوا: «مش مشكلة، إحنا هنديك واحد عيرة مجاناً».
«رقص شنباتك».. عنوان لافت اختاره القائمون على «نادى الجاز»، عنوانا لفعاليتهم الخيرية الهادفة إلى التوعية بأمراض الرجال: «دى السنة التانية اللى بنّظم فيها فعالية رقص شنباتك الخيرية، كجزء من حركة عالمية اسمها (موفمبر) هدفها نشر التوعية بأمراض الرجال زى سرطان البروستاتا. دخول الحفلة بـ20 جنيه والعائد بالكامل هيروح لأحد مراكز علاج السرطان».
تتحدث ناريمان البكرى، مسئولة العلاقات العامة بالنادى، مؤكدة أن هناك العديد من الأمراض التى تحظى بشهرة وتوعية كالإيدز وسرطان الثدى، بينما تبقى أمراض الرجال طى الكتمان، حتى إن الرجال حين يشكون من ألم ما، يبقونه سراً ولا يصرحون به كنوع من الرجولة، وهو ما يجعلهم يصابون بالعديد من الأمراض الصامتة كالسكر والضغط، ويجعل نسب الوفيات بينهم أكبر.
«موفمبر» و«رقص شنباتك» ينشران دعوة لتربية الشارب فى هذا الشهر كنوع من لفت النظر ونشر التوعية: «الحفلة عبارة عن موسيقى، دى جى بيقدمه أوز وأدهم المستكاوى، وشادى عز، كمان فى رقص، وهنوزع شنبات للناس اللى معندهاش مجاناً.. الشنب لأى حد، المهم الفكرة توصل، الموضوع بسيط والحفلة مفيهاش كلام كتير، الرسالة هتوصل من الشنبات وبس».