أديب: الموظف المهمل أخطر من مليون إخواني.. ويجب تغيير طريقة التوظيف
عمرو أديب
علق الإعلامي عمرو أديب، على خطاب وزير النقل المهندس كامل الوزير، أمام مجلس النواب الاثنين، قائلا إن الكلمة فيها تفاصيل كثيرة، وأصبح «كامل الوزير» هاشتاج، وحديث الوزير بالأمس بصرف النظر عن تفاصيله هي مشكلة الموظف العام ومحاسبته، حيث لا يوجد في مصر قدرة على التعيين أو حرية في الرفد، ولذلك يوجد مرافق كثيرة بها أشخاص غير جديرين بها «فيه ناس مش نافعين وموقفين المراكب السايرة».
وأضاف «أديب»، خلال برنامجه «الحكاية»، المذاع على منصة «شاهد» الإلكترونية، أن هذه المرافق ستظل تعاني حتى يخرج منها غير الجديرين للمعاش، وهذا اعتبار بأنه يتم تعيين موظفين بمعايير جديدة، بالتالي «اللي داخل جديد نضيف»، متابعا: «أنا معرفش كيف يتم اختيار الناس اللي تشتغل دلوقتي، يعني الموظف الجديد في السكة الحديد بيبقى عامل إزاي.. معرفش».
وتابع: «أنا رأيي أن الموظف المهمل أخطر كتير من مليون موظف إخواني، ولن يستقيم حال هذا البلد إلا إذا غيرنا طريقة التوظيف والعمل والمعاملة، أنا جبت لحضراتكم المناظرة اللي كانت ما بين الوزير وعمال السكك الحديدية اللي بيتكلموا فيها على الساعة الخاصة بالصلاة والفطار والغداء وهنشتغل كام ساعة 6 ساعات ولا 7، ده له أسباب كتير جدا».
وواصل: «الناس اللي موجودة في مصانع حكومية ومصالح حكومية ومؤسسات إعلامية بتقبض مرتبات بالملايين والمليارات كل شهر والناتج صفر، ويصروا في نهاية العام أن يأخذوا حوافز وأرباح، والأماكن المتواجدين بها خسائر، إحنا عندنا في لحد دلوقتي يستطيع الموظف لو وقفته عن العمل أو رفدته يروح يرفع قضية عشان القانون بيحميه، ويرجع تاني وياخد تعويض ويشتغل في نفس المكان اللي غلط فيه، ده فيه ناس بتخرج باختلاس ويرجع تاني».
واستكمل: «هل إحنا دلوقتي لازم ننزل على مؤسسات الدولة واللي نشوفه إخوان أو بوست مع الإخوان يمشي؟ معرفش، ما إحنا عاوزين نواجه ومش عاوزين يكون الموضوع مجرد بس إيجاد حل مؤقت، لكن في حقيقة الأمر أنا رأيي طبقا لتحقيقات النائب العام نحن لا نتحدث عن إخوان، رغم أن ده وارد جدا، لكن نتحدث عن إهمال فظيع وتزوير وناس بتستلم الشغل بتزوير إمضاءات ومدمنة مخدرات وترامادول ومكنتش موجودة في شغلها والكابينة بتاعتها، هناك إهمال».