ضابط ثان القاطرة عزت عادل: عومنا مركب أكبر من دي الأسبوع الماضي (فيديو)
السفينة البنمية
قال القبطان شحتة قورة، ضابط ثان القاطرة عزت عادل، التي شاركت في قطر السفينة البنمية التي جنحت بقناة السويس، إن البعض من غير المتخصصين قاموا بالإساءة لسمعة قناة السويس والعاملين بها خلال الساعات الأخيرة من حل الأزمة، ومنهم من المصريين.
وأضاف «قورة» خلال مداخلة هاتفية على شاشة «إكسترا نيوز»، إن السفينة طولها 400 متر وارتفاعها حوالي 60 مترا، وعرضها ضخم، «لما نيجي نشد المركب محتاجين باور عالي جدا علشان نسحب المركب من الأرض نطلعها للمسار الطبيعي ليها، ولما أسحب المركب دي لو سحبته بقوة من الشرق، ممكن ييجي يسقط عليا من الغرب ويعمل كارثة تانية أكبر، ولكن الاحتراف إني أشد المركب بقوة قطر مناسبة وبعدين تقلل تدريجيا وبعدين ننزلها واحدة واحدة ومتر متر، لأنها لو نزلت بقوة الشد هتحصل كارثة، وممكن المركب تتفتح أو تقعد تاني أو يحصلها تسرب، فالعملية كانت بتسير باحتراف، وإزاي تشدها وتنزلها في وقت مناسب وبقوة مناسبة واستغلال العوامل الجوية».
وتابع: «دي مش أول مركب تجنح، الإعلام اللي عمل عليها ضجة، وكان غير المتخصصين بيتكلموا في حاجات دقيقة، أنا قفلت الفيسبوك، ومن أسبوع تم تعويم مركب أكبر من دي والغاطس بتاعها كان فوق الـ16 مترا في بورسعيد، ومحدش حس بيها، وعوموها في 4 أيام، الهيئة بها فريق محترف بتعويم السفن، خصوصا وأن العملية علمية بحتة وتقوم على دراسات».
وشرح ضابط ثان القاطرة عزت عادل، أنه يوجد فرق لمراقبة ملاحة السفن منذ دخولها للغاطس ببورسعيد وحتى خروجها من القناة، وقاطرات الهيئة متواجدة على مدار الـ24 ساعة، طقم يسلم طقم، تحسبا لأي أزمة من الممكن أن تحدث.