سائقة التروسيكل بعد استجابة الرئيس: «كنت عايزة رخصة.. وفر لي محل بحاله»
السيدة ناهد سعيد، سائقة التروسيكل
كشفت السيدة ناهد سعيد، سائقة التروسيكل التي استجاب الرئيس عبد الفتاح السيسي، لحالتها أمس، كواليس قصتها، حيث ذكرت أن سمر صالح، الصحفية بجريدة «الوطن»، والزميل عز وهدان، الصحفي بقسم الملتيميديا بالصحيفة، اهتما بحالتها جيدًا، «إدوني مجهود جامد جدًا، من شهر 8 وأنا بتواصل معاهم، ولم يتركوني لحظة واحدة».
وأضافت «ناهد»، خلال حوارها في برنامج «من مصر»، مع الإعلامي عمرو خليل، على شاشة «CBC»: «مكنش ليا بركة بعد ربنا غير في سمر صالح»، موضحة أنها كانت تسعى للحصول على رخصة كُشك من المحافظة، وبعد استجابة الرئيس السيسي لحالتها تم توفير لها محل، «مكنتش مصدقة، بصراحة اتوهمت، أنا كنت بطلب حاجة بسيطة، كنت عاوزة رخصة بس».
وأشارت سائقة التروسيكل، إلى أنها حال حصولها على كُشك كان رئيس جمعية الأورمان وعد بفرشه ووضع بضاعه به، «حتى كلمني النهاردة قالي هجهزلك المحل وهجبلك البضاعة، قولتله ربنا يخليك، المحافظة وعدتني بتجهيزه للنهاية، المحل هيريحني كتير عن التروسيكل، ده رضا من عند ربنا، عشان هقعد وسط عيالي، دول بنات، ولما بروح الشغل ربنا اللي بيكون معاهم».
وأوضحت أن الشقة التي حصلت عليها من محافظة الجيزة اليوم، إيجار لمدة 20 سنة، بـ 100 جنيه شهريًا، «هيفرشوها لي كمان، أنا كنت بدفع 500 جنيه في الإيجار الجديد، المحافظ كمان قالي لو مش معاكي الـ 100 جنيه بتوع المحل والـ 100 جنيه إيجار الشقة متدفعيش، أنا فرحانة أوي هيعملوا لي مطبخ زي الناس، رفضت شغل بنتي في السن ده وتوليت المسؤولية».
فيما قالت دينا، أكبر أبناء سيدة التروسيكل، إن الفرحة بداخلها تتسع الكون، «لو فضلت أتكلم وأحكي مش هعبر عن اللي جوايا، بشكر الرئيس عبدالفتاح السيسي، ساعدنا كتير والمسؤولين اليوم ساعدونا كتير، وبشكر الأستاذة سمر صالح والأستاذ عز وهدان، مبسوطة بشغل ماما، الشغل مش عيب ولا حرام»، وعن أمنيتها المستقبلية، أوضحت أنها ترغب في العمل كموديل.
فيما قالت الطفلة هويدا، ابنه سيدة التروسيكل، «أول ما شوفت الشقة قولت مش معقول هنقعد في المكان الحلو ده، دي قد الشقة اللي كنا قاعدين فيها مرتين، والمحل برضوا جميل، بيضبطوا الكهرباء فيه وهيحطوا الفرش وهنبدأ نشتغل فيه»، موضحة أنها ترغب في العمل كمضيفة طيران.