صورة «السيسى» فى مولد «السيدة زينب»: مدد يا انتخابات مدد
أضيئت الأنوار المبهجة على مسجد السيدة زينب، استعداداً للمولد الذى تأتيه الوفود من كل صوب وحدب، وكالعادة انتشر الباعة فى جميع الأنحاء، وازدحم المولد فى بداياته بأطفال جاءوا للعب فى المراجيح، لكن الجديد هذا العام هو امتلاء المكان عن آخره بصور المرشح الرئاسى المشير عبدالفتاح السيسى، التى استيقظ مريدو السيدة ففوجئوا بها معلقة فى كل مكان.
«المولد السنة دى يختلف عن كل سنة، كل سنة الليلة الكبيرة بتكون آخر تلات من رجب، الموافق 27 مايو، لكن السنة دى قدموها لـ20 مايو، عشان الانتخابات الرئاسية»، قالها محمد عبدالكريم، بائع فاكهة أمام مسجد السيدة: «الصور السياسية دى جديدة علينا السنة دى، وأنا ماعرفش مين اللى علقها من امبارح بالليل لحد الصبح».
الحاج سيد صاحب المراجيح، قال بوجه غاضب: «الانتخابات بوظت المولد، لا عارفين المولد إمتى ولا أى حاجة، وناس كتير من اللى جايين مايعرفوش إن الليلة الكبيرة معادها اتغير، ربنا يرزقنا السنة دى».
«صور السيسى دى من أول امبارح شغالين فيها، وامبارح الصبح كملوها، فيها إيه لما نفرح بالمولد ونشتغل سياسة فى نفس الوقت، أصل السيسى من الجمالية.. جارنا يعنى».. هكذا رحب محمد عبدالعزيز، أحد أبناء السيدة والشهير بخادم السيدة، بصور السيسى فى المولد.