مرشد سياحي ينتقد رواد مواقع التواصل بسبب كورونا: هتقطعوا لقمة عيشنا
المرشد السياحي حازم هاشم
علق المرشد السياحي حازم هاشم، على حالة الهلع والشائعات التي تتناقل حول فيروس كورونا المستجد على مواقع التواصل الاجتماعي.
وقال هاشم خلال فيديو نشره على حسابه الشخصي على "فيس بوك": "إحنا راجعين من النوبة ومعانا أجانب، وعايز أقول للمصريين اللي هيقطعوا لقمة عيشنا، بسبب الإشاعات والرغي وكورونا وإن البلد ضايعة ومش بتعمل حاجة إن عندك نقطة نقص وبتقول إشمعنا برا عندهم وإحنا يبقى أكيد عندنا، ومش عاجبك الوزيرة دا بيضرب السياحة في مقتل بسبب اللي إنت بتعمله في الميديا والسوشيال ميديا، وإن أنت بتضيع جمال البلد دي وكلنا هنقعد في بيتنا".
وتابع: "بلدك أحسن من أي بلد والاستعدادات اللي بتعملها البلد مش معمولة في بلاد كتير، وهنصور بعد كدا مع الفرنسيين اللي معانا وهنقولك بيقولوا إيه بالنسبة للاستعدادات واللي البلد بتعمله".
واستطرد: "إحنا أحسن من دول كتير، والمصريين على دماغي، لكن قعدنا سنين في البيت بسبب ثورة، ودلوقتي عايزين تقعدونا تاني بسبب الإشاعات، وياريت متقولوش حاجة أنتم مش متأكدين منها، بدل متطمن اللي حواليك وتبقى راجل وست مسؤولة، وعملنا تحاليل في الأقصر وكل النتائج طلعت سلبية واللي عنده حاجة بيتعالج".
وواصل: "معانا فرنسيين اللي هما تاني بلد متأثرة بعد إيطاليا بس مش بيعملوا كدا رغم إنهم بينتقدوا بلدهم برضو لكن بيتفسحوا وعايشين. تعالوا شوفوا بلدكم والصعيد مفيهوش كورونا ولا حاجة".