لا يزال فاعلو الخير يبذلون قصارى جهودهم لمساعدة سكان المناطق والقرى الفقيرة، من بينهم مها البدرى التى استأجرت 12 سيارة لشفط المياه وردم الأرض بعد غرق شوارع ومنازل منطقة العوايد فى الإسكندرية فى مياه الأمطار، حيث تعانى هذه المنطقة من ضعف البنية التحتية.
استعانت «مها» بسيارتين للشفط، و10 للردم، طيلة 5 أيام، لإنقاذ سكان المنطقة من مياه الأمطار التى وصل منسوبها إلى أكثر من مترين: «الدور الأرضى فى معظم البيوت كان غرقان، والميّه ملوثة، يعنى وارد جداً إن السكان يصابوا بأمراض، وماكانش فيه حل غير الشفط». بعد أن تلقت «مها» استغاثات كثيرة من سكان المنطقة اتفقت مع بعض أصحاب سيارات الشفط والردم مقابل أجر بسيط: «فيه ناس ولاد حلال اتبرعوا بـ 2000 جنيه وزّعتهم على العمال، وده يُعتبر أجر قليل نظير الجهد اللى قاموا بيه فى كل شوارع المنطقة».
أكدت «مها» أن سكان المنطقة شاركوا فى العمل بتسليك البلاعات: «اللى كان بيقدر على حاجة بيعملها»، لافتة إلى أنه بعد شفط المياه تم ردم الشوارع وتسويتها حتى تصبح ممهدة: «قعدنا 5 أيام مش بننام عشان نقدر نشفط الميّه ونسلّك شبكة الصرف الصحى عشان المنطقة ماتغرقش تانى لحد نهاية الشتاء»، وبعد انتهائها من تلك المهمة، تستعد حالياً لعمل بحث ميدانى فى مناطق أخرى لمساعدة سكانها: «الشتاء فى الإسكندرية صعب جداً، خصوصاً على سكان المناطق اللى شبكة صرفها مش قوية، كل شتاء بعمل جروب وبجمع عليه كل الحالات اللى محتاجة مساعدة، وكل ما ييجى لى فلوس أو أقدر أجمع تبرعات بنزل أساعدهم».
تعليقات الفيسبوك