فى الوقت الذى يبحث فيه الكثيرون عن طرق آمنة للتخلص من أكياس القمامة، تقوم الشقيقتان «آلاء»، 29 عاماً، و«فاطمة عرفة»، 22 عاماً، باستغلالها فى الرسم، مستخدمتين هذه الأكياس بألوانها المتعدّدة فى صناعة لوحات، لها حس فنى مختلف وجذاب، كذلك فرصة للحفاظ على البيئة والتقليل من استخدام المواد البلاستيكية.
موهبة فنية مميزة، أصرت الشقيقتان على تعلمها والتطوير منها، وبدأتا فى ممارستها عن طريق الرسم بالقلم الرصاص، ثم الفحم، رسمتا كل وجوه المشاهير والمعالم السياحية والأثرية، حتى خلقتا لنفسيهما اختلافاً فى هذا المجال: «علشان نكون متميزين بنعمل حاجات محدش غيرنا عملها ولا قدمها، فبقينا نرسم على أى حاجة، لقينا نفسنا تلقائى بنحوش أكياس الزبالة ونرسم بيها».. حسب «آلاء».
الرسم بيكون من خلال قص الأكياس وربطها، وأحياناً تضطر الشقيقتان إلى تسييحها بالنار: «بنستخدم مسدس الشمع كمان علشان ألزق الأكياس جنب بعضها علشان نعمل الشكل اللى عايزينه»، تستغرق اللوحة ساعتين فقط، لإنجازها بشكل جذاب: «لما بنكون قاعدين فاضيين يا إما بنقعد نفكر هنعمل إيه يا إما بنطلع صورة ونقلدها»، كذلك تقومان بالرسم على الزجاج، باستخدام التراب: «لما الشتاء بدأ يهل والتراب كتر قوى بهدل ترابيزة السفرة وقبل ما أنضفها رسمت عليها حاجة للتسلية مش أكتر، من كتر حبى فى الرسم ورغبتى إنى عايزة أكون مختلفة ومميزة فى المجال»، عُرفت الشقيقتان بين أسرتهما بحبهما لاقتناء الأكياس البلاستيكية: «ماما بقت تقول لاخواتى لمّوا الأكياس وإدوها لآلاء وفاطمة يعملوا لنا لوحة حلوة نحطها فى الصالون».
تعليقات الفيسبوك