م الآخر| فتنة
مفتون
والفتنة من القتل أشد
مجنون بسقاية العليق
طب فين الورد؟
مفطوم على فن الصعب
وعوم البحر
شرط يكون الشط سراب
**
مفتوح يا كتاب
وحروفك بالخط الحر
وغلافك داب
محتاج للناس؟
يكفي الأحباب
وبتشتي الدنيا في عز الحر
لو فكرك عاز
قلمك عكاز
وبتنسى الدنيا في بسمة بنت
بلون الماس
عبد التجديد
وأصعب شيء في حياتك وعد
مهما اديت الدنيا وعود
أسوأ مواعيد
وكأن وصول الآخر فرض
شيء بيقول إنك موجود
ضد التحديد
وكلامك بيمط المعنى
خِلف خِلاف السما والأرض
بتحب المواضيع العايمة
ده لأنك بتخاف م الرفض
ولأنك حساس.. بتثور
ع الدوشة.. وع الزحمة
طابور
وتقدر إحساس العتمة
أكتر من كشاف النور
وتحب الوحدة عن اللمة
ويتساووا..
إن وُجد السور
وكتير بيقولوا إنك مغرور
ده لأنك تقدر تستغنى
ولأنك مش فارقة معاك
بتعيشها بقلبك وطبيعتك
وإن خربت
يا حبيبي فداك
كام واحد حواليك بيلوم
كان من جوه بيتمناك؟
هاها.. ولا حد
تلقائي لأبعد حد
وبتتريأ حتى عليك
ولأبعد حد تقول بعينيك
مش بتدكن أي إعجاب
بتخاف م الحب؟
كلام تلاكيك
يتقال لجيران..
يتقال لصحاب
لكن أما قابلت عينيها يوميها
عرفت يا قلبي إنك كداب
عرفت يا قلبي إنك مفطوم
على فن الصعب
وعوم البحر
شرط يكون الشط سراب
أنا لما قابلت عينيها يوميها
عرفت يا قلبي إنك مفتون
وعرفت يا قلبي إزاي هتكون
مبسوط لو تقدر تفتح باب