طلاب المدارس يستقبلون الربيع بالسباحة فى النيل: «اهرب يالا»
أطفال يعومون فى النيل فى منطقة قصر النيل
بدأت درجات الحرارة فى الارتفاع، ومع حلول أول أيام فصل الربيع، انطلق عدد من طلاب المدارس، خاصة طلاب المرحلتين الابتدائية والإعدادية، قفزاً فى نهر النيل فى منطقة كوبرى قصر النيل، بعضهم نزع ملابسه، والآخر شمر عن ملابسه المبللة، وآخرون اكتفوا بالفرجة خوفاً من النزول والإصابة بنزلة برد.
اكتفى الطالبان أحمد إسماعيل وعبدالرحمن محمد، فى الصف السادس الابتدائى، بالمشاهدة، وبحسب «أحمد»: «مالناش دعوة بيهم، إحنا مستأذنين من أهالينا ورايحين حفلة فى النادى، وقعدنا شوية نتفرج، مش مزوغين ولا حاجة».
خرج يوسف سعيد، من مياه النيل بملابسه المبللة، غير عابئ بما يمكن أن يتعرض له، يسكن «يوسف» فى منطقة البساتين، وجاء خصيصاً لنزول النيل مع أصحابه: «المياه حلوة مش ساقعة، وأنا ما صدقت الشتا خلص، ومفيش مدرسة النهارده، ومش معايا فلوس أعوم فى حتة تانية، وأول مرة آجى هنا»، تعلم السباحة من والده: «نفسى أفرح وأنبسط وأنزل حمام سباحة ولو مرة».
يخرج الأطفال واحداً بعد الآخر، وهم فى حالة من السعادة منهم أحمد فتحى، فى المرحلة الإعدادية: «باجى أعوم فى النيل على طول أول ما الشتاء يخلص، وعادى محدش بيكلمنا ولا يزعق لنا»، تعلم «أحمد» السباحة فى مركز شباب بمنطقة بولاق، مقابل ١٠ جنيهات فى الساعة.