فوق الـ60 ويبحث عن عروسة: هادية.. عشان ماليش فى الخناقات
كمال
تخطى الستين عاماً وما زال يبحث عن شريكة حياته، بعد قرار تأجيل استمر أكثر من 20 عاماً، بسبب عدم جاهزيته للزواج فى مرحلة الشباب.
حياة مليئة بالأزمات والصعاب عاشها كمال عباس، 61 عاماً، حالت دون زواجه فى سن مناسبة، لكنه لم يفقد الأمل فى الاستقرار وبناء أسرة. كان «كمال» يعمل وكيلاً بوزارة الزراعة، ثم خرج على المعاش، ويروى قصة حياته قائلاً: «كنت بفكر فى موضوع الجواز زى أى شاب، لكن حصلت لى ظروف فى أوائل الأربعينات، اتنصب عليا فى مبلغ كبير وخسرت كل فلوسى، وطبعاً ماكانش ينفع ساعتها أرتبط، لأن اللى بيطلع لى من شغلى على قد مصاريفى»، قالها «كمال»، مؤكداً أنه حاول بدء حياته من جديد وجمع بعض الأموال للعمل فى تجارة السيارات إلى جانب وظيفته الحكومية.
يبحث عن سيدة فى الأربعينات من عمرها، ويفضل أن تكون أرملة ومتدينة: «مش عايز مطلقة، لأن بيبقى فيه خلافات مع طليقها، كمان المرأة المطلقة بتستبعد الراجل من حياتها للمرة الثانية للعيش دون قيود، خاصة لو كان عمرها فوق الـ40، عكس الأرملة التى فرض عليها تكون وحيدة، ولازم طبعاً تكون متدينة وهادية عشان إحنا مش حمل مشادات وخناقات بينا».
«الستات كمان فاكرين إن الراجل بعد سن الـ60، بيبقى عجوز ومش قادر يقف، لكن القصة مش كده خالص»، موضحاً أنه ما زال شاباً ويتمتع بطاقة شاب فى الـ30 من عمره، ويمارس رياضة المشى.