ورش لتحسين خطوط طلاب المدارس: بيكتبوا «نكش فراخ»
طلاب مشاركون فى إحدى ورش الخط العربى
«يلا بينا نحسّن خطوطنا»، شعار رفعته بعض مراكز الخط العربى بعد المستوى الردىء الذى وصل إليه الأطفال مؤخراً، إهمال حصة الخط العربى بالمدارس جعل هذه الأكاديميات تستقبل الكثير من الطلاب لمساعدتهم على تحسين خطوطهم. مصطفى الطايفة، مدرب خطوط بأحد مراكز الخط العربى بمدينة طنطا محافظة الغربية، لاحظ منذ 4 سنوات تدهوراً كبيراً فى مستوى خطوط الأطفال، فقرر إقامة بعض الورش المجانية لتحسين المستوى: «الأطفال بتبقى مسترخمة الموضوع جداً، وفيه كتير منهم بييجوا غصب عنهم، الكتابة على الموبايلات وأجهزة الكمبيوتر بوّظت خطوط جيل كامل، خطهم مايتقريش كأنك بتفك شفرة».
يلاحظ «مصطفى» اهتمام أولياء الأمور بتحسين خطوط أبنائهم بشكل كبير: «فى فترة الإجازة الكورسات بتكون زحمة جداً كاملة العدد، وأولياء الأمور بيكونوا خايفين لأن خطوط أولادهم سيئة جداً فى الامتحانات وغير مفهومة، فيه ناس بتجيبلى أطفالها خطوطهم عبارة عن دوائر ومثلثات، الخط بالنسبة ليهم رسم، نكش فراخ زى ما بنقول بالعامية وبيكون سنهم كبير».
بعضها مجانى والآخر بأسعار تتراوح بين 25 و250 جنيهاً
الرغبة فى التعلم أهم ما يجب توافره فى الطفل، بحسب «مصطفى»: «فى الأول بنعمل إنترفيو ونشوف مستوى خطه، لو الطفل ماعندوش صبر ورغبة إنه يمسك القلم ويطوّر نفسه مش بنقبله». وتتراوح أسعار الورش بين 100 و150 جنيهاً: «وده بيكون 3 مستويات لتعليم الكتابة بالخط النسخ والرقعة»، ويقدم المكان بعض الورش المجانية خلال فترة الإجازة.
حالة من الحزن سيطرت على هبه فاروق، مدربة للخط العربى، التى لاحظت على مدار 18 عاماً من العمل بالكورسات، تدهور حالة الخطوط بشكل ملحوظ: «زمان كان الطفل ولى أمره بيجيبه الكورس عشان يحسّن مستوى خطه، دلوقتى بييجى مش عارف يكتب أصلاً، إملاء الكلمات بيكون غير سليم وشكلها وحش».
لم تقتصر ورش تحسين الخطوط على صغار السن فقط بل الكبار أيضاً: «فيه ورش بتبدأ من سن 16، ودى بتكون مفاجأة لناس كتير، بس فعلاً أولياء أمورهم بيكونوا عانوا معاهم ومفيش أى حل». تتراوح أسعار الورش بين 25 و250 جنيهاً: «بتختلف حسب مدة الورشة، فيه ناس بتحب تحضر باليوم، خاصة فى فترات الدراسة والامتحانات، لكن بنقدم بعض الورش خلال الإجازة بشكل مجانى».
أنواع مختلفة من الخطوط يتعلمها الأطفال، أهمها الرقعة والنسخ: «إحنا بنعلمهم الحروف كل حرف بيكون ليه نسب معينة وارتفاع وعرض بيختلف عن التانى».
يزداد الإقبال على الورش خلال فترة الامتحانات، وذلك بحسب قول ياسمين الشريف، مدربة تحسين الخطوط بمحافظة الإسماعيلية: «المستوى بقى صعب جداً، خاصة فى الطلاب الأولاد، هما أكثر نسبة خطوطهم سيئة»، ويصل سعر الكورس إلى 120 جنيهاً: «الطفل أول ما بييجى بيكون مش عارف يقرأ اللى كاتبه بإيده بعد أول حصة المستوى بيختلف تماماً، وخطه بيتحسن، وهو بيفرح».