2014.. والأوتوبيس أبو"WiFi"
بدأنا سنة جديدة وهنكتب 2014 بدل 2013 في الكشكول، والدنيا بقت حلوة، ومرسي مشي، وكله زي الفل.. هييييه.
بدأت السنة من غير تفجير كنيسة الساعة 12 بليل،الله يرحم شهداء الغدر في كل مكان ومن كل دين، والشباب راحت عملت كل اللي نفسها فيه، واليوم عدى تمام، والدنيا كانت زي الفل، وكلنا مبسوطين بالسنة الجديدة.
السنة جديدة آه بس إحنا لسة عايشين في 2011، آه والله زمبؤلك كدة، تحب نذيع؟.. خليك معايا للآخر وهشرحلك أنا.. بس مش هقول كل حاجة عشان أنا سيس ومش حمل سجون.
وإتغير رقم السنة بدل"13" النحس ده بس فضل الشعب زي ما هو لا لاقي يأكل، ولا لاقي حق العلاج بس المهم مصر اتقدمت وبقى فيها أتوبيس بـ"WiFi" بغض النظر إن نص الشعب ميعرفش أصلًا يعني أيه "Smart Phone".
مستوى التعليم، والصحة، والاستثمار و.. و.. و.. لسه زي ما هو، بس المهم.. إن إحنا "نور عنيه".
لسه اللي ماتو في 2011 لحد النهاردة حقهم مجاش، والباشوات بياخدو براءات، وإحنا بنقول "هابي نيو يير".
اليأس مش خيانة.. الإحباط اللي أي حد نزل في 25 يناير حاسس بيه دلوقتي مش عشان مرسي مشي أو الحكم العسكري رجع تاني للسلطة، لا لا إطلاقًا، الاكتئاب ده سببه إن صاحبي اللي كان واقف جنبي في الميدان اللي دلوقتي موجود تحت التراب لو زارني في الحلم مش هقدر أبص فعينه، ولا عارف هاقوله أيه. بزمتكم مش حاجة تكسف؟.