«هيصة مهرجانات».. الأهالى يفضلونها «شعبى»: لا صوت يعلو على صوت «الدوشة»
رواد المقاهى وسائقو التوك توك والميكروباص جمهور الأغانى الشعبية
أصوات الأغانى الشعبية والمهرجانات تصدح من سماعات التكاتك وسيارات الميكروباص والمحال والمقاهى فى ميدان المطرية، تتداخل أصوات المغنين مع بعضها، وتسبب ضجيجاً يفوق ما تصدره كلاكسات السيارات ونداءات الباعة الجائلين، كل سائق يسمع ما يحلو له، يرفع الصوت بحسب إمكانيات سماعاته، وكأنها منافسة بين محبى أصوات المطرية فى ساحة كبيرة، يسمعون أشرف مزيكا ومحمد صيام وعلى فاروق وشحتة كاريكا، ومجدى شطة، الأكثر شهرة بين مطربى المطرية.
«حسنى»: هما اللى رافعين اسم المنطقة بره و«نور»: ولاد بلدنا وبيقولوا كلام قريب مننا
داخل مقهى شعبى قريب من الميدان، يجلس العشرات من مختلف الأعمار، يسمعون أغنية للمطرب الشعبى أشرف مزيكا عبر سماعات ضخمة، وهو الأكثر طلباً من الرواد، ويفضله أيضاً أصحاب المقهى: «أشرف مزيكا قبل أى حد، ابن المطرية وحبيبنا»، كلمات نور عيد، أحد رواد المقهى، الذى يفضل أيضاً سماع المطرب على فاروق: «ولاد بلدنا وبيقولوا كلام قريب مننا، برضه متربيين معانا»، الحديث عن المغنين الشعبيين يسرق وقتاً كبيراً من رواد المقهى، كل منهم يحكى عن المطرب والأغانى المفضلة له: «دول ساعات بيتجمعوا كلهم عند الميدان، فنانين المطرية بقى». يفضل محمد حسنى سماع المطرب محمد صيام: «إحنا بنحبهم كلهم، هما اللى رافعين اسم المنطقة بره، لكن كل واحد بيفضّل مغنى معين»، لكن لا ينكر أن مجدى شطة أخذ الصيت كله: «دلوقتى الكلام كله بقى على مجدى، بقى ظاهرة ومسمّع بصراحة، وهو اللى مسيّط منطقتنا بره». محمود التيمى، سائق توك توك، يحب مجدى شطة، ويشغل أغانيه باستمرار فى التوك توك الخاص به: «بسمعه من حوالى سنتين كده، كلامه مظبوط، ده كان سواق توك توك زى حالاتى وكلها محصلة بعضيها»، والحال نفسه بالنسبة لـ«إبراهيم حسنى»، سائق توك توك: «أنا بحب مطربين المطرية كلهم، حاسس إنهم مننا وبيغنوا فى أفراحنا ومحدش اتغرّ علينا». يسمع مينا أمين، سائق توك توك، على فاروق ومجدى شطة وشحتة وأمير ماندو: «كل واحد فيهم حاجة، فيه المهرجان وفيه الشعبى، وكلهم بيغنوا كلمات تشبهنا». لا يخلو ميكروباص أشرف إبراهيم من أغانى مطربى المطرية، وأبرزهم «شحتة» و«سعيد فتلة»: «مشغلهم على طول، ماعرفش أشتغل إلا على صوت المهرجانات الشعبية، وطبعاً متحيز لولاد منطقتى». يحتفظ محمد ثروت، سائق، بأغانى مجدى شطة على تليفونه المحمول، يسمع أغنية «مركب الصحاب» لمجدى شطة: «هو مش أحسن واحد بس بيجيب كلام الناس».