بريد الوطن| اخرج «بره الدنيا».. وابتسم للحياة
صورة أرشيفية
النهارده كان يوم حلو لى، مش عشان رجعت البيت لقيت أمى عاملة السمك اللى بحبه، يومى كان رائع بجد عشان خلق جواية حاجة مش موجودة قبل كده، اسمها «بره الدنيا»، طبعاً كلمة أول ما تسمعها هتقول يا رجل حرام عليك، هو إحنا دخلناها عشان نكون براها؟ بس الحقيقة بره الدنيا اللى أقصدها هى بره دنيتك أنت، كل واحد منا جواه وحواليه دنيا عايش فيها، دنيته هو العالم الخاص اللى بيملكه ويعيش فيه، ودى الدنيا اللى عايز أكتب عنها، محيطك، أى واحد عايش فى العالم بتاعه بيفكر إن دى نهاية الدنيا، إن حدود الدنيا بتقف على آخر نظرة عينيه، على حدود قرايبه ومعارفه وشغله، يا سيدى آن لك أن تغير نظرتك ونظريتك عن هذه الدنيا، آن لك أن تذهب لترتفع عن سطح الأرض كثيراً لترى كم هى أكبر من نظرك، آن لك أن تطلق العنان لبصرك وبصيرتك ليسبحا معاً فى غمارها، أن تذوب فيها فتنسى همومك، آن لك أن تخرج بره الدنيا، نعم اللذة والمتعة أن تعلم أنها أكبر من الدائرة التى وضعت ذاتك بداخلها وأغلقتها، تخيل يا صديقى العزيز يوماً أن تترك كل تلك المتاعب وتذهب بعيداً وتكتشف أصدقاء جدداً وأماكن جديدة، كن متيقناً تماماً أنك فى هذه اللحظات تفك معصمك من جميع القيود، التى وضعتها فيه، إنك تتحرر من كل الطاقة السلبية التى تحيط بك.
محمد فهمى - محام - أشمون
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com