الشيف حسن: محدش له «لَزمة» فى المهنة غيرى
الشيف حسن
استطاع على مدار أكثر من 25 عاماً أن يترك «تكّاته وحركاته» لدى المشاهدين، الذين تحركوا معه من قناة فضائية إلى أخرى، هو الوحيد الذى استطاع أن يلحن الوصفات الخاصة بالأكل بأسلوب مميز، فضلاً عن الروح المرحة التى عُرف بها، والتى دفعته لأن يتغزل فى الأطعمة التى يقدمها أمام الشاشة.
الشيف حسن، مقدم برنامج الطبخ على قناة «إم بى سى مصر»، هو صاحب مفردات جديدة دخلت إلى المطبخ المصرى ومنها «التكّات» و«الحركات» و«يا جمالو يا جمالو»، التى أصبح جمهوره يتداولها عنه، ومن شهرته فى مجال الطهى أصبح نجم إعلانات للعديد من المنتجات الغذائية والكهربائية.
الراجل أشطر من الست فى المطبخ.. وعمرى ما كنت مغرور
بداية، ما سر نجاح الشيف حسن؟
- حبى وإحساسى بالشغلانة، لأن أنا بحب شغلى جداً، وسبب استمرارى إنى بستعمل أدواتى، وأدوات الشيف حسن هى خبرته، أنا كمان متابع جيد لكل ما يخص المطبخ وحريص على حضور المعارض الدولية، فقبل أن أكون «شيف» إعلامياً مشهوراً أنا فى المهنة أصلاً شيف فندقى مشهور.
هل عانيت حتى تحقق نفسك فى مهنتك؟
- طبعاً عانيت جداً، فى الأول كان نفسى أدخل الكلية الجوية وكانوا بيقولوا لى بقى هاتسيب حلم الجوية وتروح تشتغل طباخ، ووقت ما قدمت محدش عرف فى البيت لأن أنا من بلد فلاحين فى ميت غمر، الناس هناك مش بتتقبل العمل فى مجال المطبخ ولما اتقبلت فى المعهد العالى للسياحة والفنادق قلت لهم أنا دخلت قسم استقبال مش قسم المطبخ علشان أخفف الصدمة عليهم.
ماذا استفدت من المطبخ بعد أكثر من 20 عاماً خبرة؟
- المطبخ فيه التزام أشبه بالجيش، وفيه تركيبات لو لم يتم تركيب البند الأول بشكل صحيح فالعاشر حتماً سيفشل، العملية كلها أشبه بـ«تروس» الماكينة وهذا ما تعلمته فى المطبخ.
أى من أبنائك ورث عنك حب المطبخ؟
- علياء بتحب المطبخ وشاطرة وأنا بقول لها «يا بنتى دى شغلانة متعبة»، تقول لى «لا يا بابا، أنا حابة الأكل اللى بعمله الناس تاكله وتجربه».
هل تحب زوجتك الطهى؟
- بتحبه جداً وشاطرة قوى بس مش أشطر من الشيف حسن.
على يد من تعلمت فن الطهى؟
- بعد ما اتخرجت من المعهد العالى للسياحة والفنادق سنة 1977، اشتغلت فى كل فنادق القطاع العام وبعد التخرج اشتغلت فى شركة فرنسية وبعد كده تنقلت فى فنادق كبرى وحصلت على دورات، ومن هنا تعلمت فن صناعة الطعام.
ما أكثر مطبخ يفضله الشيف؟
- الفرنسى طبعاً.. فيه تشكيلة كتيرة وأطعمة مختلفة.
لماذا لا تشترك فى مسابقات وبرامج الطبخ وما رأيك فيها؟
- لأنى مابحبهاش، برامج المطبخ لها عرف معين، يغلب عليها العاطفة وهذا غير عادل.
ما رأيك فى برامج الطبخ المنتشرة فى الفضائيات؟
- لا يصح إلا الصحيح.. البرامج دى ظاهرة وهتختفى.
مَن الشيف الذى تراه يمثل المطبخ المصرى؟
- الشيف شربينى.
ومن الذى تعتبره منافسك؟
- عمر ما جه على بالى إن فى حد بينافسنى، لأن كل واحد وله ملعبه، أنا بشتغل شوربات وسلطات وحلويات ومعجنات ومخبورات باحتراف، لكن الباقيين كل واحد محترف فى جزئية واحدة، الخلاصة مفيش حد بينافسنى وده مش غرور.
ما أول أكلة صنعتها ولم توفق فيها؟
- كانت كيكة وماكانش فيه جهاز يعمل المارينج، فباظت منى.
لماذا تصر على استخدام كلمات «تكّات وحركات ويا جمالو يا جمالو»؟
- مش حكاية إصرار على استخدامها، دى «لزمتى» ومش موجودة عند حد خالص، محدش له «لزمة» فى المهنة إلا أنا الحمد لله، والناس بتعرفنى بالكلمات دى.
من وجهة نظرك، أيهما أشطر فى المطبخ المرأة أم الرجل؟
- الراجل، مش عاوزة كلام، أصل شغلانة المطبخ فى أساسها راجل وإحساس الراجل مختلف عن الست، والشغلانة إحساس ورؤية مش طبخ وخلاص.