مـسحراتى
صورة أرشيفية
مسحراتى
منقراتى
لقيت أهلاً
نزلت سهلاً
الأرض برحة
والأشيا معدن
وليالى سمحة
نجومها سبحة
إن كنت نايم
يا نايم اصحى
شوف قلبى هايم
واخدنى فسحة
ما فيش مآسى
على غير مقاسى
يا أبوقلب قاسى
ما بطلوا دا
فى مصر ثورة
عفية قادرة
أيادى سمرا
وأنفاس ودودة
وأيام تزامل
فلاح وعامل
بالخير حوامل
الخير ولودة
واللى فى خيالى
صبح محقق
أحضن عيالى
وأبوس وازقق
وانشد ليالى
بقصب يزقزق
باشيل تلالى
بالكروم وباعزق
فى نجوم تلا لى
عمال أبعزق
المشى طاب لى والدق على طبلى
ناس كانوا قبلى قالوا فى الأمثال
الرجل تدب مطرح ما تحب
وانا صنعتى مسحراتى فى البلد جوال
حبيت ودبيت كما العاشق ليالى طوال
وكل شبر وحتة من بلدى حتة من كبدى حتة من موال