«جيم» لأصحاب الوزن الثقيل ومتحدّى الإعاقة.. وببلاش
«عزيز» صاحب الجيم
طوال الوقت ينشغل فى تقسيم أوقاته ما بين ممارسة رياضة الكاراتيه وألعاب القوى المختلفة.. بدأ عزيز البدرى (48 عاماً)، منذ أن كان عمره 17 عاماً، وما زال لديه الشغف نفسه بالتعرف على كل جديد فى عالم الرياضة، حتى يدرب جيرانه، بشارع النوايا، بدمياط الجديدة، ويخصص جزءاً من وقته لأصحاب الإعاقات المختلفة، الذين يستقبلهم داخل صالة الجيم الخاص به، لتدريبهم بدون أى مقابل مادى.
علمته الرياضة أن يكون مسئولاً تجاه المجتمع، فقرر تشجيع ذوى الاحتياجات الخاصة على ممارسة الرياضة، لتحدى إعاقتهم: «أنا راجل رياضى وفاهم إن فيه ناس ممكن يكون عندها إعاقة بس مش عارفة إزاى توظفها وتبتدى تمارس أى رياضة زيهم زى أى حد، ففتحت لهم باب الجيم، ييجوا فى أى وقت من غير فلوس». تعلم «عزيز» التعامل مع الإعاقات المختلفة كشلل الأطفال، وقصار القامة وغيرهم، فكل منهم له برنامج خاص به، يقدم له، ويستعين أحياناً ببعض المدربين الرياضيين المتخصصين لمساعدته.
الاشتراك الشهرى للجيم لا يتعدى الـ100 جنيه للأصحاء: «ربنا ادانى الصحة، عشان أستغلها صح، أدرب نفسى كل يوم وأخلى غيرى يتعلم الرياضة وأقدر أحببه فيها».
يساعد الراجل الأربعينى، فى عمله نجله، باستقبال زوار الجيم، وتعليمهم ممارسة الرياضة الصحيحة: «علمت ابنى الرياضة وكل حاجة عنها، ولما بيرجع من الجامعة بيساعدنى وينزل الجيم بالليل يدرب الناس».
يفتح أبواب الجيم أيضاً بالمجان، أمام أصحاب الوزن الثقيل: «عشان بلعب رياضة طول الوقت، فصحتى دايماً فى الأحسن، وده المثل اللى بأوريه للناس هنا عشان أعودهم على الرياضة عشان تكون شىء أساسى فى حياتهم».