المادة الواحدة بـ«50 جنيه» فى الشهر.. حتى الـ«كى جى» بقى ليها دروس تقوية
أطفال داخل حضانة أثناء حضورهم مجموعة تقوية
بمجرد انتهاء اليوم الدراسى، يسرعون إلى أماكنهم التى حفظوها جيداً داخل الحضانات، التى تقدم خدماتها لطلاب «الكى جى»، بتوفير دروس تقوية، فأصبح الاعتماد على دروس التقوية، عدوى انتشرت بين الأهالى، الذين يبحثون طوال الوقت عن أفضل المدرسين والأماكن المناسبة للدروس الخصوصية لأطفالهم بمراحل الـ«كى جى»، وتتراوح أسعار المواد لأطفال الكى جى، من 25 إلى 50 جنيهاً شهرياً، على حسب المنطقة.
إحدى الحضانات، بمنطقة المرج، خصّصت مجموعات تقوية لمدة ثلاثة أيام فى الأسبوع، فى اللغة العربية والإنجليزية والرياضيات، لتأسيس أطفال الـ«كى جى»، وتأهيلهم للمرحلة الابتدائية، وتستقبلهم بعد ميعاد المدرسة فى الفترة المسائية من الساعة 4 عصراً، إلى 7 مساءً، ويحصل الطفل على شرح وتبسيط المواد: «بنساعد الطفل ونشرح له كل مادة فى يوم».. تقولها صباح محمد، مسئولة الحضانة.
تركز الحضانة على مراجعة المواد مع الأطفال، من أجل تثبيت المعلومات الدراسية البسيطة: «ماينفعش حد يستهون بطفل كى جى، لأن دى مرحلة التأسيس، لو ماتأسسش كويس، مش هيقدر يفهم فى المدرسة حاجة».
«صباح»: ماينفعش حد يستهون بطفل «كى جى» لأن دى مرحلة التأسيس.. وفيه ناس مابتعرفش تتعامل مع أولادها فى المذاكرة.. و«سماح»: فيه ناس بتحب تريّح دماغها.. وبيلجأوا لدروس التقوية
حصول «صباح» على بكالوريوس رياض أطفال، هو ما دفعها لتأسيس حضانة تقدّم دروس تقوية للأطفال: «بنساعده فى الحضانة يقرا الحروف، علشان فى المدرسة يقدر يشبّك الحروف على طول من غير ما يغلّب المدرسين وأهله».
يتراوح عدد الأطفال داخل مجموعة التقوية من 3 إلى 4 أطفال، وتعتمد الحضانة على مدرسين للمرحلة التأسيسية «أنا أول واحدة أعمل الفكرة دى، وفى البداية ناس كتير استغربتها، وفيه ناس مابتعرفش تتعامل مع أولادها فى المذاكرة، فبتسيبهم عندى، وبيكون حل كويس ليهم».
ترى سماح حسن، مسئول حضانة «خديجة» بمنطقة شبرا الخيمة، أن تأسيس وتقوية الطفل فى «كى جى» أهم من المرحلة الابتدائية نفسها: «أصل الطفل بعد كده بيتصدم إنه بياخد جمل كاملة ودروس». وضعت «سماح» فى أولوياتها الاهتمام بتنمية عقلية الطفل فى عمر الـ3 و4 سنوات، وهو ما جعلها تُخصّص أماكن لدروس تقوية لأطفال الـ«كى جى» 1، 2، عقب الانتهاء من يومهم الدراسى بالمدرسة، فيصل سعر المادة الواحدة إلى 50 جنيهاً: «مستوى الطفل اللى بيتأسس كويس من كى جى، بيبقى أفضل من اللى داخل المدرسة على طول من غير تأسيس».
ترى «سماح» أن هناك أولياء أمور يشتركون لأطفالهم فى دروس التقوية بسبب الاستسهال، حتى لا يضطروا إلى تعليم أطفالهم: «فيه ناس بتحب تريّح دماغها على الآخر.. وبيلجأوا لدروس التقوية من الـ(كى جى)».