للمهتمين فقط: أكل بيتى للقطط والكلاب لمواجهة أسعار الـ«دراى فود»
«أيمن» يحمل قطته
ببعض المقادير البسيطة «دقيق وخميرة وتوم ولبن وزبادى وكمية قليلة من اللحوم»، يواجه مربّو القطط والكلاب ارتفاع أسعار بيع أغذية الـ«دراى فود» الخاصة بها، التى أصبحت تتراوح بين 45 و200 جنيه حسب الوزن ومكان المنشأ.
«كتير مننا بيكون نفسه يدّى كلبه دراى فود كويس ونضيف بس الأسعار ارتفعت جداً، بقيت أعمل الدراى بنفسى للكلب وعرفت صحابى الطريقة»، فمن خلال بعض المقادير غير المكلفة استطاع أيمن جاد، الاستغناء عن الـ«دراى فود» الجاهز، مقابل إعداد وجبات منزلية سهلة يُطعم بها كلبه ويقوم بإعداد هذه الوجبة ثلاث مرات أسبوعياً: «نص كيلو دقيق، معلقة خميرة صغيرة، فصّين توم، ربع كوباية ماء ورد، ربع بصلة، نص كيلو لبن، زبادى بلدى كوباية كبيرة، نص كيلو لحمة أو فراخ».
كما استطاعت نرمين علاء أيضاً إعطاء قطّتها نصيباً من وجبات الـ«دراى فود» البيتى: «كنت بجيب للقطة الأكل بتاعها بـ20 دلوقتى بقت بـ45 جنيه، فمش هقدر أشتريها كل شهر بعمل أكلها فى البيت مع الأكل بتاعنا وبتمشى».
بنكهة النعناع تجهز «نرمين» وجبة لقطتها بعد إضافته إلى جميع المقادير: «نص كيلو دقيق من القمح الكامل، 3 ملاعق دقيق ذرة، فراخ مسلوقة وقطعة صغيرة مكاريل، أو خضار ويضاف إليه المكاريل، ملعقة صغيرة نعناع، ثلث كوب حليب مجفف، بيضة واحدة، الفراخ بعد ما نسلقها نضربها مع شربة فى الخلاط، ونضيفها للمقادير».