لكل مَدرَسة «قهوتها»
محمود
داخل أحد المقاهى القريبة من منطقة بها عدد من مدارس التعليم الفنى والصناعى بـ«إمبابة»، التى تعتبر مخصصة لطلبة المدرسة فى الصباح حسب قول «القهوجى» وفى محاولة من فريق «أصحاب» لمعرفة سر جلوس الطلبة على هذا المقهى، جلسنا مع بعض الطلبة بمدرسة التعليم الفنى الصنايع، وبدأنا حواراً خاصاً بهم كطلبة جالسين على مقهى أثناء اليوم الدراسى.
قال محمود جمال، أحد طلبة مدرسة صناعية «أنا باجى كل يوم على القهوة هنا قبل اليوم الدراسى وبافضل قاعد لحد ما الطابور يخلص والحصة الأولى كمان وبعدين أروح المدرسة، وبيبقى معايا صحابى طبعاً، أصل مفيش فرق بين قاعدتنا هنا على القهوة وجوّه الفصل، بالعكس إحنا مرتاحين هنا أكتر، إحنا بنقعد نتكلم ونلعب بس مش بنشرب شيشة ولا بنعمل حاجة غلط، ولو الغياب اترفع خالص مش هنروح المدرسة ويبقى أحسن». المفهوم نفسه يتبعه صديقه خالد مصطفى، فيقول «المدرسة عارفة إننا بنبقى قاعدين هنا، ده المدرسين كمان بيقولوا لنا كده أحسن عشان مايدخلوش حصص، بس أحياناً ينصحونا ده لازم بعد ما ياخدوا الغياب ويبعتوه، بعدها نقدر نطلع، بدل ما احنا بنتعبهم ونصدَّعهم، وأفتكر فى مرة المدرس كان قاعد جنبنا على القهوة هنا وشايفنا بنيجى نقعد هنا عادى جداً، إحنا بنيجى هنا نفطر الأول قبل المدرسة، ولو فى يوم دخلنا المدرسة وحسينا إننا زهقانين وحبينا نخرج بنخرج عادى، بس ساعات بيبقى صعب نخرج وقتها نضطر نستأذن إننا نجيب فطار بس ونرجع المدرسة، بس بصراحة ماننكرش أن فى ناس شاطرة بتفضّل الجلوس فى الفصل يمكن يستفيدوا أى حاجة». التقط طارق عيد أطراف الحديث من صديقه، وقال مشيراً إلى كل الجالسين على المقهى «بص، كل اللى حوالينا دول طلبة برضو، وفى مشكلة ممكن تعتبر أن دى هى سبب قاعدتنا هنا، أن أهالينا مش قادرة تفهم أن المدرسة مش بتعلمنا أى حاجة، كل اللى فى دماغهم أن اللى مايروحش المدرسة ده يبقى فاشل، طيب مانا ممكن أقعد فى البيت وأستفيد بوقتى وأعمل حاجة أفيد، يعنى على الأقل ممكن أروح أشتغل وأجيب فلوس بدل ما همّ مش بيفيدونى كده، وأنا أكتر حاجة بتضايقنى هنا الناس كلها بتقول دى صنايع والبخت ضايع، أنا ضد المثل ده بس الناس كلها ماشية بيه هنا، والصنايع تعليم زيها زى التعليم الثانوى العام، ومش عارف ليه الناس بتستقلّ به، وعلى فكرة أنا مجموعى كان يجيب ثانوية عامة بس أنا مادخلتهاش عشان أنا حابب الصنايع».
من ناحية أخرى قال عبدالرحمن سالم «القهوجى»: «أنا القهوة عندى الصبح مليانة بالشباب الطلبة، وده بيضايق زباين تانية عشان ساعات بيحسوا أنهم وسط مدرسة، بس أعمل إيه وقت المدارس فترة الصبح معروف بكده، وكمان وقت الامتحانات مش فى فترة أيام المدارس العادية، سواء قبل الامتحان أو بعدها».