شاب يحول أرض خلاء إلى كافيه: بدل ركنتها
الكافيه بعد تسقيفه بالصاج
طاولات بلاستيكية وشاشات عرض كبيرة وسقف من الصاج، يمتد لمسافة 400 متر، يجد فيه أهالى شبرا الخيمة متنفساً لهم، يتناولون فيه المشروبات ويتبادلون الأحاديث ويلعبون الشطرنج، بعد أن قرر «هانى» استغلال الأرض التى ورثها كمقهى، أطلق عليه «ساعة لقلبك».
«الأرض كانت فاضية وملك ليا وابن عمى اللى توفى، فقلت بدل ما تفضل مركونة نشغلها ونسترزق منها، وعشان مش معايا فلوس أبنيها دلوقتى عملتها كافية»، قالها «هانى بدر»، 35 عاماً، صاحب المقهى، مشيراً إلى أنه حرص على ألا يتعدى على الطريق كما يفعل البعض: «استفدت من حيطة البيت اللى جنبى، وعشان أنا على ناصية شارع جبت سلك وغطيته ببلاستيك وقماش وعملت السقف صاج، والأرضية بكنسها كل يوم وبرشها مية».
طاولات مزدحمة، وشباب يمارسون ألعاب الفيديو والشطرنج، وبالقرب منهم شاب يتصفح الإنترنت على جهازه الشخصى، «أنا بحب المكان ده عشان مش مقفول وفيه خصوصية، واحترمت فى صاحبه إنه مش متعدى على الشارع ولا سارق كهرباء، وبيعامل الناس كلها باحترام» حسب سيد الرافعى، أحد مرتادى الكافيه الذى يقع بأرض الجنينة بشبرا الخيمة.