أغانٍ فى نفق «كامب شيزار»: الفن للجميع
مؤمن وأندرو
بمجرد نزولك على دَرَج نفق كامب شيزار بمنطقة وسط الإسكندرية، تُفاجأ بسماع موسيقى أغانى فيروز ووردة وأم كلثوم، يعزفها شابان فى مدخل النفق بهدف إسعاد المارة وإدخال البهجة والسرور عليهم كل صباح، «مؤمن زكريا» و«أندرو ناصر»، الصديقان اللذان فضّلا عزف الموسيقى بالنفق، بدلاً من الجلوس على المقهى أو التنزّه فى الطرقات. وقال «مؤمن»، عازف «الرق»: «إحنا كنا قاعدين على القهوة وقلنا بدل ما نضيّع وقتنا، نعزف شوية للمارة فى النفق ونسمعهم أغانى شرقية قديمة ونبسطهم، وهما رايحين الشغل الصبح أو حتى وهما بيتفسحوا على الكورنيش».
تحمّل الصديقان حر النفق تحت الأرض من أجل إسعاد المارة: «ناس كتير بتفضل واقفة تسمع الأغانى وتتسلطن، خصوصاً كبار السن، وناس بتلقى علينا التحية وهى ماشية، وناس بتفكر أننا عايزين فلوس، بس إحنا بنعمل ده من غير مقابل».
وقال «أندرو»، عازف الكمان: «كفاية البسمة اللى بنشوفها على وش الناس وهما رايحين شغلهم، دى فى حد ذاتها تخلينا مستمرين فى تقديم فن الشارع».