الحكومة تواجه أزمة الطاقة بـ«ترشيد الكهرباء من الإيمان»
اللافتة التى علقتها وزارة الكهرباء لترشيد الاستهلاك
لسنوات طويلة، ظلت الحكمة «النظافة من الإيمان»، هكذا تعلمها الأطفال فى المدارس ومع المحاولات التى تبذلها وزارة الكهرباء لدعوة المواطنين للترشيد، فإن الحكمة تحولت إلى «ترشيد الكهرباء من الإيمان»، اللافتة التى تدعو أهالى الجيزة إلى الضحك أحياناً، وتحوز إعجابهم فى الوقت نفسه.
وضعت لافتة على لوحات توزيع التيار
على لوحات توزيع كهرباء الجيزة، يرى محمد مدبولى، الذى يسكن فى المنصورية منذ قرابة 15 عاماً، اللافتة وسيلة إيجابية لترشيد استهلاك الكهرباء لأهالى منطقته منذ تعليقها قبل عام: «أزمات الكهرباء قلت كتير عن الأول وسنة 2016 من أكتر السنين اللى محستش بيها بأزمة انقطاع الكهرباء، لأن بقى فى وعى أكتر من الأول من الإعلانات الجديدة فى رمضان، لكن من قبلها فكرة لافتة ترشيد الكهرباء من الإيمان فرقت مع الناس برضه»، يوضح الرجل الأربعينى أن الحكومة كانت لا تستطيع توعية المواطنين بشكل كامل لترشيد الاستهلاك قبل عام، لذلك فكر فيها هو ومجموعة من الأهالى فى حكمة اللافتة وعرضوها على شركة كهرباء الجيزة حتى قاموا بتنفيذها: «الفكرة سمعت عنها الأول من أصحابى فى طنطا، وبعدها كان النور بيقطع عندنا كتير ومفيش إعلانات، فعرضت الفكرة أنا وبعض الجيران على الشركة وهما تكلفوا سعر اللافتات وعلقوها على لوحات توزيع الكهرباء فى الجيزة كلها». الحكمة التى وضعت على اللافتة تدعو المارة إلى الضحك أحياناً كثيرة رغم الإعجاب بها، حتى تعودوا على وجودها بالمنطقة، وأصبحت طبيعية، بحسب «محمد»، ويقول: «الناس فى الأول كانوا بيضحكوا لما يقروها، وفى ناس كتير استجابت ليها فى الوقت اللى مكنش فى إعلانات لترشد استهلاك الكهرباء، ومن يومها موجودة لحد ما الناس أخدت عليها وبقت زى مقولة النظافة من الإيمان، والناس بتعمل بيها».