الشطرنج للأذكياء فقط
الشطرنج للأذكياء فقط
على الكافيه، لا صوت يعلو فوق صوت التلفاز. الكرة العالمية والأوروبية هى المتربعة على عرش قلوب رواد المقاهى. الأهلى والزمالك دائماً ما كانا الأكثر شعبية وينافسهما على الصدارة البرسا وريال مدريد مع لقاءات الدورى الإنجليزى حامية الوطيس.
مقهى المشربية بالعاشر من رمضان هو أحد أعرق المقاهى فى المدينة وأكثرها شهرة على الإطلاق. يعج بكل صنوف الرواد ذوى الاهتمامات المختلفة التى ذكرناها آنفاً. ولا يقتصر نشاط المقهى على مشاهدة مباريات الكرة والألعاب الترفيهية ولكنه يحتضن أيضاً كوكبة من أمهر لاعبى الشطرنج فى المدينة.
«بدايتنا هنا كانت فى أول سنة 2012.. كنت قاعد أنا وشوية أصحاب ليّا ومكانش ليّا ساعتها فى الشطرنج قوى.. يعنى كنت هاوى كده بَلعب مثلاً مرة كل أسبوعين تلاتة.. لحد ما جه مدرس رياضيات اسمه أستاذ أشرف وراح مقطعنا.. وهكذا فضل يكسبنا لحد ما قررت إنى آخد الموضوع تحدى وأبدأ ألعب أكتر وأذاكر»، هكذا بدأ محمد أحمد (FIGO) حديثه عن بدايته فى لعب الشطرنج على مقهى المشربية.
واستكمل الحديث قائلاً: «اللى بدأوا معانا فى اللعب بانتظام هم محمد طلال وإبراهيم القاضى وأحمد عباس.. وبقالنا فترة بنتجمع ونلعب بانتظام.. يعنى تقريباً كل يوم كده».
«عشان تلعب شطرنج مش كفاية أبداً إنك تكون ذكى وموهوب.. لازم كمان تلعب كتير وتذاكر كتب عن الاستراتيجيات وطرق اللعب وتشوف فيديوهات والكلام ده كله بياخد وقت كبير.. وده لازم أعمله عشان أوصل لحلمى أنى أكون لاعب دولى بإذن الله»، هذا ما قاله FIGO عن طموحه: «وعشان أكمل طريقى اللى ممكن أقول إنى قطعت تِلتينه.. لازم أضحى بوقت من دراستى وفُسحى وأصحابى عشان أوصل لحلمى بإذن الله».
أما محمد طلعت فقد حكى لنا عن بداياته مع الشطرنج قائلاً: «أنا جدى وجوز خالتى هم اللى علمونى شطرنج.. ولما وصلت لإعدادى كده جدى بدأ يعلمنى التكتيك والتخطيط فى اللعب وادانى كتاب هدية.. ومن ساعتها وأنا بَلعب.. لحد ما وصلت للجامعة وخسرت فى نهائيات بطولة الجامعات.. قررت أن الموضوع صعب ومحتاج فلوس وتركيز فقررت أخليه كهواية وماكملش فيه.. لحد ما جيت ع المشربية مع زمايلى مرة ولقيت ناس بتلعب فقعدت ولعبت معاهم من دافع التحدى.. وبعد فترة رجعنا نشجع بعض ورجعت تانى أذاكر وألعب أكتر وقررت إنى أحاول أوصل لمستوى عالى فى اللعب».
«إحنا هنا عددنا حوالى عشرين أو تلاتين واحد مثلاً.. من أعمار مختلفة يعنى من أول 14 سنة لحد الـ55 كده.. وبرضه المستويات مختلفة بس معظمنا بقى مستواه عالى الحمد لله»، هكذا تحدث محمد طلعت عن المجموعة: «منّا ناس كتير بتشارك فى بطولات محلية فى القاهرة والإسكندرية والشرقية ومنا ناس بتسافر بطولات دولية فى دبى وقطر أو لو بتتلعب هنا فى القاهرة ونقدر نقول إن مستوياتهم كويسة جداً بالنسبة للمحترفين».