بعد تأجيل انتخابات 2015.. «الجيزة» تزيل شوادر دعاية المرشحين
لم تمضِ دقائق على قرار إبطال الانتخابات الدستورية لإعادة تقسيم الدوائر وتأجيلها دون موعد محدد، حتى سارعت سيارة بلدية الجيزة صوب جامعة القاهرة، لإزالة شوادر المرشحين التى حملت لافتات دعايتهم الانتخابية مبكراً عن موعدها القانونى، ملتزمين بحكم القضاء وسط عربات الشرطة التى تحاصرهم.
«شوادر المرشحين بقالها أكتر من شهرين جوّه الصينية وفى الشوارع، وإحنا من يوميها بلغنا المحافظة وما اتشالتش غير دلوقتى»، كلمات لخصت بها آيات محمد، من أهالى الجيزة، الأمر، حيث لفت انتباهها إزالة لافتات وشوادر المرشحين فور إلغاء الانتخابات، دون الاهتمام ببلاغات الأهالى فى دعاية المرشحين التى بدأت مبكراً، «كانوا مستنيين تتلغى عشان يشيلوها، ده فيه مرشحين عندنا اختاروا رمز انتخابهم وحطوه على لافتاتهم وعلقوها فى الشوارع عندنا من قبل فتح باب الترشح أساساً، ده غير التجاوزات اللى كانت بتحصل من بعض المرشحين، وبلغنا بالأسامى على أكتر من مرشح فى الجيزة بيوزع بوستراته على الناس من قبل ما يدخل الانتخابات وتتفتح». «البلدية من أول يوم مخالفة للافتات المرشحين المعلقة فى الشوارع وبيتم إزالتها، لكن المشكلة أن المخالفات كانت بزيادة من قبل فتح باب الترشح»، قالها المسئول عن الرد بخدمة الخط الساخن بمحافظة الجيزة -طلب عدم ذكر اسمه- مؤكداً أن المحافظة استجابت لبلاغات الأهالى وبمجرد إعلان قرار تأجيل الانتخابات نفذنا على الفور التعليمات بإزالة اللافتات ونزول عربات الإشغالات فى الأماكن الرئيسية وبدأنا من أمام جامعة القاهرة.