منظمة خيرية هدفها تقديم العلوم للأطفال بطرق مشوقة.. راح زمن «الحشو»
تقديم العلوم للأطفال بطريقة مشوقة
تباهى الأمم بمبدعيها، فدائماً ما تُعتبر العلوم والفنون مقياس رقى الأمم وتطورها. فالمبدع الذى يضيف لبنة فى صرح العلم لا يكتب المجد لنفسه فقط، بل لأهله وبلده والبشرية جمعاء. ولأن العالم أدرك أهمية العلوم وتحصيلها والتنافس فى تطويرها، تجد كل دولة تدفع بأنبغ من فيها إلى المسابقات والمحافل العلمية الدولية كأولمبياد الفيزياء وغيرها من المسابقات. ولأن إعداد العالم النابغ يبدأ من الطالب الفاهم الواعى المتفكر، تولى Nutty Scientists اهتماماً خاصاً بالعلوم وكيفية تقديمها للأطفال فى صورة بسيطة ومشوقة لجذبهم إليها وتحبيبهم فيها.
Nutty Scientists بدأت فى أمريكا ووصلت مصر مؤخراً وتستخدم الألعاب والمسرحيات لجذب الأطفال
«إحنا فى Nutty Scientists هدفنا إننا نحول تعليم العلوم المختلفة من فيزيا وكيميا وأحياء من مجرد حفظ وتجارب لمتعة.. ودايماً بنحاول نربطها بالحياة»، هكذا بدأت رانيا فرج -المديرة الإدارية- حديثها عن Nutty Scientists، واستكملت حديثها قائلة: «Nutty Scientists هى منظمة عالمية.. بدأت فى أمريكا وأوروبا عشان تطور من تعليم العلوم وتنشره على نطاق أوسع ودلوقتى هى موجودة فى كذا دولة من ضمنها أمريكا وإسبانيا والبرتغال وجنوب أفريقيا ومصر طبعاً».
وعن بداية المنظمة فى مصر قالت رانيا: «إحنا بدأنا شغل فى مصر فى سنة 1996.. ساعتها كان أستاذ فضل سليمان ودكتورة شيرين ومجموعة من الناس المؤمنة برسالة Nutty Scientists اتواصلوا مع المقر الأم فى أمريكا وأخدوا حق تنفيذ الفكرة هنا فى مصر والحمد لله على مدار السنين دى كلها قدرنا إننا نوصل لمرتبة عالية من الجودة والثقة على مستوى فروع Nutty Scientists فى العالم وخدنا السنة دى حق فتح فروع والإشراف عليها فى أى مكان فى منطقة الشرق الأوسط والبحر المتوسط».
«إحنا شغلنا كله مع مدارس خاصة.. وشغلنا ده بيكون عن طريق إننا بنروح المدارس دى فى إجازة الصيف ونص السنة عشان نعمل معسكرات وورش وعروض بأساليب شيقة لتعليم العلوم للأطفال والطلاب من سن 5 إلى 16 سنة وتحببهم فيها.. والعروض دى بتتضمن تجارب ومسرحيات وألعاب عشان نحبب الأطفال فى الموضوع»، هكذا تحدثت رانيا عن النشاط الحالى للمنظمة. أما عن المستقبل فقالت: «إحنا بدأنا نتعاون من فترة مع كيانات تانية زى مستشفى 57357 ورُحنا وعملنا عروض شرح وتعليم للأطفال المرضى هناك.. وهدفنا فى الفترة الجاية هو توسيع دايرة نشاطنا عشان تشمل المنظمات الخيرية والأهلية المعنية بالأطفال وتعليمهم وكمان نحاول نساعد فى تطوير مناهج وزارة التربية والتعليم».
وعن تجربة العمل مع Nutty Scientists حدثنا أحمد سليم -طالب بكلية هندسة عين شمس- قائلاً: «أنا اتعرفت على Nutty Scientists من سنتين تقريباً بس بدأت شغل معاهم من فترة قريبة.. والصراحة التجربة ممتعة جداً.. لسببين.. أولاً إنى بحب التعامل مع الأطفال جداً.. وثانياً.. إنى كنت بكره العلوم وأنا طالب.. الدش والحشو وقلة التطبيق كانوا بيقتلوا متعتهم للأسف.. فده اللى خلانى حابب شغلى هنا والمكان اللى أنا فيه والرسالة اللى بنقدمها».
واستطرد حديثه عمّا يتمناه فى المستقبل للمنظمة: «أنا نفسى نفضل ماشيين على نفس النظام.. النظام اللى بيخلينا نستمتع بالعلم وبتدريسه للأطفال.. ونفسى أن كل الأطفال تحب العلوم وتاخدها عن طريق التجربة والتفكير بدل الدش والحفظ.. لأن لما الطفل يفكر ويتدبر ويجرب عمره ما هينسى.. ده غير إنه هيعرف يطبق المنهج العلمى فى حياته.. وده هيأثر على مستقبله وبلده بعد كده!».